एकीकृत पाठ्यक्रममा आधारित बालकेन्द्रित क्रियाकलापहरू

About the Author

युवराज लौडारी बालमैत्री विद्यालय र बालकेन्द्रित सिकाइ प्रक्रियाका कुशल प्रशिक्षक एवम् सर्जकका रूपमा परिचित हुनुहुन्छ ।

विक्रम सम्वत् २०१२ माघ ८ गते जन्मनुभएका लौडारीले २०३२ सालदेखि प्राथमिक तहबाट अध्यापन सुरु गर्नुभएका लौडारीले २०४२ साल त्रिभुवन विश्वविद्यालयबाट अङ्ग्रेजी विषयमा बिएड् पूरा गरी तत्कालीन निमावि र मावि तहमा अध्यापन गराउनुभएको थियो । उहाँले प्राथमिक शिक्षा परियोजनाअन्तर्गत विभिन्न जिल्लाहरूमा कार्यक्रम संयोजक, अनौपचारिक शिक्षा एकाइ र स्रोत केन्द्र विकास एकाइ मा विशेषज्ञका रूपमा कार्य अनुभव सँगाल्नुभएको छ ।

लौडारी २०५८ सालदेखि विभिन्न सामाजिक संस्थामा कार्यरत हुनुहुन्छ । उहाँले सामुदायिक विकास प्रवर्तन केन्द्र काठमाडौँमा वरिष्ठ कार्यक्रम संयोजक, समुन्नत नेपालमा तालिम तथा सामाग्री विकासविज्ञ साथै कार्यक्रम संयोजक जस्ता विभिन्न जिम्मेवारी पूरा गर्नुभएको छ ।

लौडारीले आफ्नो पेसागत जीवनको आधाभन्दा बढी अवधि तालिमका लागि खर्चिनुभएको छ । बालमैत्री विद्यालय मेलमिलाप कार्यक्रम व्यवस्थापन अनुगमन र मूल्याङ्कन जीवनोपयोगी सीप र शिक्षण सिकाइसम्बन्धी विभिन्न तालिम लिनु र दिनुभएको छ ।

उहाँले विभिन्न पालिकाहरूमा स्थानीय विषयको पाठ्यक्रम र पाठ्यपुस्तक निर्माणमा समेत काम गर्नुभएको छ । उहाँले शिक्षा क्षेत्रका विभिन्न परियोजना र कार्यक्रमहरूका लागि पाठ्यक्रम साथै तालिम म्यानुअलहरूमा समेत सहलेखन गर्नुभएको छ ।

'एकीकृत सिकाइमा आधारित बालकेन्द्रित क्रियाकलापहरू' उहाँले पवनकुमार अधकारीसँगको सहलेखनमा तयार पार्नुभएको पुस्तक हो । यो पुस्तक शिक्षकहरूका लागि उपयोगी छ ।

About the Author

पवनकुमार अधिकारी बालबालिकाका लागि क्रियाकलापहरूको विकास र शैक्षिक सामग्री निर्माणमा विशेष दक्षता राख्नुहुन्छ । उहाँसँग ३० वर्षदेखि बालमैत्री शिक्षा, जीवन उपयोगी सिप विकास, पाठ्यक्रम र पाठ्यसामग्री निर्माण, तालिम सहजीकरण र सञ्चालन, सामाजिक परिचालन साथै परियोजना सञ्चालन आदि क्षेत्रमा काम गरेको पेसागत अनुभव छ ।

विक्रम सम्वत् २०२८ साउन १ गते जन्मनुभएका अधिकारीले समाजशास्त्र र बिजनेस एड्मिनिस्ट्रेसनमा स्‍नातकोत्तर तहको अध्ययन गर्नुभएको छ भने शिक्षा संकायमा पनि स्नातक तहसम्मको अध्ययन गर्नुभएको छ ।

हाल शिक्षा क्षेत्रमा काम गरिरहेको संस्था समुन्नत नेपालको निर्देशकका रूपमा सक्रिय अधिकारीले युनाइटेड मिसन टु नेपाल, सामुदायिक विकास प्रवर्तन केन्द्र काठमाडौँ, प्रयास नेपाल बिराटनगर जस्ता विभिन्न संस्थामा रही काम गरिसक्नुभएको छ । उहाँले युनिसेफ, प्लान इन्टरनेसनल नेपाल, सेभ द चिल्ड्रेन, एक्सन एड, वर्ल्ड भिजन इन्टरनेसनल अदि संस्थाका लागि तालिम सहजीकरण एवम् परामर्शदाताका रूपमा सेवा दिनुभएको छ ।

अधिकारी बालमैत्री विद्यालय र बालकेन्द्रित सिकाइ प्रक्रियाका कुशल प्रशिक्षक र सर्जक हुनुहुन्छ । उहाँको विशेष दक्षता तथ्याङ्क विश्लेषण साथै अध्ययन तथा अन्वेषणमा पनि छ । उहाँले विभिन्न राष्ट्रिय एवम् अन्तर्राष्ट्रिय संघसंस्थासँग पाठ्यक्रम एवम् सामग्रीहरूको विकासका कामहरूसमेत गर्नुभएको छ ।

'एकीकृत सिकाइमा आधारित बालकेन्द्रित क्रियाकलापहरू' उहाँले युवराज लौडारीसँगको सहलेखनमा तयार पार्नुभएको पुस्तक हो । यो पुस्तक शिक्षकहरूका लागि उपयोगी छ ।