पशुपक्षीहरूको जुलुस

About the Author

नेपाली साहित्यका बहुचर्चित पुस्तकहरूमध्ये एक 'पागल बस्ती'का लेखक सरुभक्त आफ्ना बालपाठकहरूका लागि पनि उत्तिकै समर्पित हुनुहुन्छ ।

२०१२ साल मंसिर १२ गते पोखराको बागबजारमा जन्मनुभएका सरुभक्त नेपाल संगीत तथा नाट्य प्रज्ञा प्रतिष्ठानको पूर्व कुलपति र नेपाल प्रज्ञा प्रतिष्ठानको पूर्व सदस्य हुनुहुन्छ ।

उहाँका 'चुली', 'समय त्रासदी', 'एक अभिनवको आत्मकथा', 'छोरी ब्रह्माण्ड, 'यमागल', 'पदार्थहरूको गीत', 'प्रतिगन्ध' जस्ता आख्यान कृतिहरू पनि उत्तिकै चर्चित छन् । उहाँले 'पागल बस्ती' उपन्यासका लागि २०४८ सालमा नेपालको प्रतिष्ठित मध्येको एक मदन पुरस्कार प्राप्त गर्नुभएको थियो ।

उहाँ रङ्गमञ्च पनि सक्रिय हुनुहुन्छ । उहाँले 'युद्ध उही', 'ग्यास च्याम्बरभित्र', 'इतिहासभित्रको इतिहास', 'शिशिरका अन्तिम दिनहरू', 'इथर', 'गाउँघरका नाटकहरू', 'सिरुमारानी', 'मलामी', 'शरणार्थी', 'थाङ्ग्ला' लगायतका नाटक प्रकाशित छन् । उहाँका 'बन्द खामभित्र', 'बोक्सीको आह्वान र घोषणापत्र', 'कवि, प्रेमी र पागल', 'कुरूप मसिहा', 'इतर समय', 'मनभरि माटोभरि', 'ज्यानमाया' आदि कविता सङ्ग्रह पनि प्रकाशित छन् ।

पोखरेली युवा सांस्कृतिक परिवार, युवा नाटक परिवार, प्रतिबिम्ब नाट्य परिवार जस्ता क्रियाशिल संस्थाहरूका संस्थापक सरुभक्त पोखरा सार्वजनिक पुस्तकालयका पूर्व अध्यक्ष हुनुहुन्छ । उहाँले राष्ट्रिय बाल प्रतिभा पुरस्कारको स्थापना पनि गर्नुभएको छ ।

उहाँले बालबालिकाका लागि 'अँध्यारो कोठा' उपन्यास लेख्नुभएको छ भने बालनाटकहरूको सङ्ग्रह 'राक्षस र बालबालिका' पनि प्रकाशित छ । 'झ्याउँझ्याउँ झ्याउँकिरी' उहाँका बालकविताहरुको सङ्ग्रह हो भने 'नातिका कथा' चाहिँ बालकथा सङ्ग्रह हो । उहाँका बालचित्रकथाका पुस्तकहरू 'गँडाहाहरूको गाउँ', 'पशुपक्षीको जुलुस', 'लाहुरेको सन्तान', 'घटोत्कचको आत्मकथा', 'डहरको भूत', 'सजायको अन्त्य', 'मित्रताको कथा', र 'पाठ' प्रकाशित छन् । उहाँले सवाईको लोक लयमा पृथ्वीको उत्पत्ती र विकासक्रमबारे 'पृथ्वीको सवाई' पुस्तक तयार पार्नुभएको छ ।

संरक्षण कविता यात्राका संयोजकसमेत रहेका सरुभक्तले पोखरेली प्रतिनिध कविता सङ्ग्रह 'सारस्वत' साथै 'सिद्धिचरणका जेल संस्मरण' जस्ता पुस्तकहरूको सम्पादनसमेत गर्नुभएको छ । उहाँले अङ्ग्रेजी साहित्य, अर्थशास्त्र, इतिहास र समाजशास्त्रमा स्नातकोत्तर गर्नुभएको छ ।

उहाँले २०३८ सालमा अन्तर्राष्ट्रिय अपाङ्ग वर्षका क्रममा उत्कृष्ट नाटकको पुरस्कार प्राप्त गर्नुभएको थियो भने २०४२ सालमा नेपाल राजकीय प्रज्ञा प्रतिष्ठानबाट उत्कृष्ट नाटककार र राष्ट्रिय कविता महोत्सवको प्रथम पुरस्कार प्राप्त गर्नुभएको थियो । २०४३ सालमा युवा वर्ष मोति पुरस्कार पाउनुभएका सरुभक्तले लोकेन्द्र साहित्य पुरस्कार २०५१, नेपाल बालसाहित्य समाज उत्कृष्ट बालपुस्तक लेखन पुरस्कार २०५४, शिरोमणि पुरस्कार २०५४, गोपीनाथ अर्याल रङ्गमञ्च पुरस्कार २०५६, गङ्की बसुन्धरा पुरस्कार २०५७, सहित दर्जनौ पुरस्कार र सम्मान प्राप्त गर्नुभएको छ ।