140.00
ऋतु
Description
पुस्तकले कविताको माध्यमबाट ऋतुहरूलाई चिनाउँछ । प्रत्येक ऋतुका विशेषतालाई किताबमा शब्द र चित्रमार्फत झल्काइएको छ । किताबलाई पेन्सिल चित्रकलाले सज्जा गरिएको छ ।
दीपेन्द्र भट्ट
About the Author
दीपेन्द्र भट्ट प्रारम्भिक कक्षा पढाइ तथा गणितीय सिप, बालमैत्री एवम् बाल केन्द्रित शिक्षण सिकाइ साथै शिक्षण सिकाइ सामग्री उत्पादन तथा प्रयोग जस्ता विषयका प्रशिक्षक एवम् परामर्शदाता हुनुहुन्छ ।
परिचय पब्लिकेसनका निर्देशकसमेत रहनुभएका भट्टको 'ऋतु' शिर्षकको बाल चित्रकविताको पुस्तक प्रकाशित छ । उहाँले सहलेखन गर्नुभएका पुस्तकहरू 'अक्षरका गीत', 'आधा आधा आलु', र 'गाउँदै गन्दै खेल्दै' पनि उपलब्ध छन् । उहाँले नेपाली भाषामा अनुवाद गर्नुभएका बालपुस्तकहरू 'उथलपुथल', 'चन्द्रमा र टोपी', 'उड्दा उड्दै', 'कोइलीको कथा', 'तुला र तरकारी', 'रुख' पनि बजारमा उपलब्ध छन् ।
२०३२ बैशाख ११ गते सप्तरीको राजबिराजमा जन्मनुभएका भट्टसँग अनौपचारिक शिक्षाका पाठ्यपुस्तकहरूको सहलेखनको अनुभवसमेत छ । स्नातक तहसम्मको अध्ययन पूरा गर्नुभएका भट्टसँग मानव अधिकार तथा सामाजिक सेवा केन्द्र सप्तरी, सामुदायिक विकास प्रवर्तन केन्द्र काठमाडौँ, विश्व शिक्षा जस्ता राष्ट्रिय तथा अन्तर्राष्ट्रिय संघ संस्थामा आबद्ध भई शिक्षासँग सम्बन्धित विभिन्न कार्यक्रम र परियोजनामा काम गरेको अनुभव छ । उहाँले विगतमा युनिसेफ, सेभ द चिल्ड्रेनलगायत विभिन्न संघसंस्थाका शिक्षासँग सम्बन्धित तालिमहरूको सहजीकरणसमेत गर्नुभएको छ । तालिम सहजीकरणको सिलसिलामा उहाँले नेपालका ७२ जिल्लाको भ्रमण गर्नुभएको छ ।
उहाँ नेपाल बालसाहित्य समाजको आजीवन सदस्य हुनुहुन्छ भने सार्थक शिक्षा, चेञ्जिङ स्टोरिज जस्ता शिक्षा क्षेत्रमा काम गर्ने संघसंस्थासँग पनि आबद्ध हुनुहुन्छ ।
Read More
देवेन्द्र पाण्डे देवेन
About the Illustrators
देवेन्द्र पाण्डे ‘देवेन’ नेपालका चर्चित कार्टुनिष्ट एवम् इलस्ट्रेटर हुनुहुन्छ । विक्रम सम्वत् २०३१ कार्तिक ८ गते काठमाडौँमा जन्मनुभएका पाण्डे देवेन नामबाट कार्टुन र चित्रहरू बनाउनु हुन्छ ।
उहाँले 'मचानमा म', 'मामाघरको रोपाइँ', 'कुखुरी', 'सुरुङको बाटो', 'तोरीबारी', 'चिन मलाई', 'ऋतु', 'डहरको भूत', 'चमचम चङ्गा र लिलिपुट', 'चराको घुमघाम', 'डुङ्गामा सलल', 'अआ पढ्ने बेला', 'ऐया र आत्था', 'को हो हँ कखगघङ', 'गाउँदै गन्दै जान्छु', 'घ्यार्रघुर्र', 'चराका कथा', 'झ्याउँझ्याउँ झ्याउँकिरी', 'एकीकृत क्रियाकलापमा आधारित बालकेन्द्रित क्रियाकलापहरु' लगायतका सयौँ पुस्तकहरुमा चित्र बनाउनु भएको छ ।
सृजना कलेज अफ फाइन आर्ट्सको ग्राफिक कम्युनिकेसन विभागमा प्राध्यापनमा संलग्न देवेनले त्रिभुवन विश्वविद्यलय अन्तर्गत ललितकला क्याम्पसबाट फाइन आर्ट्समा प्रथम श्रेणी सहित स्नातक तह पुरा गर्नुभएको छ । हाल उहाँ नेपाल रिपब्लिक मिडिया प्रा लिका प्रकाशनहरू नागरिक दैनिक, रिपब्लिका दैनिक, शुक्रबार साप्ताहिक र परिवार मासिकमा नियमित रुपमा कार्टुन र इलस्ट्रेसन बनाउनुहुन्छ । उहाँले कान्तिपुर दैनिक, द काठमाण्डु पोष्ट र कामना प्रकाशन समुहका पत्रपत्रिकाहरूमा पनि कार्टुन र इलेस्ट्रेसनको काम गर्नुभएको थियो ।
कार्टुनिष्ट क्लब नेपालका पूर्व कोषाध्यक्ष देवेन आर्टिस्ट्स सोसाइटी नेपालको समेत सदस्य हुनुहुन्छ । उहाँले नेपालको कला क्षेत्रको इतिहासमा पहिलो पल्ट सन् २००३ मा नेपाल आर्ट काउन्सिलमा पप–अप्स कार्ड डिजाइनको एकल प्रदर्शनी गर्नुभएको थियो । उहाँले काठमाडौँ र फुकुआमा, जापानमा सम्पन्न विभिन्न चित्रकला प्रदर्शनीहरूमा सहभागी भई आफ्ना चित्रहरू प्रदर्शन गर्नुभएको छ ।
उहाँले चित्रकारका रुपमा नेपालका लागि संयुक्त राष्ट्रसंघिय मानव अधकार उच्च आयुक्तको कार्यालय, युनेस्को, रुम टु रिड भारत र नेपाल, प्राक्टिकल एक्सन, सेभ द चिल्ड्रेन आदि अन्तर्राष्ट्रिय संघसंस्था र निकायसँग पनि काम गर्नुभएको छ ।
उहाँले नेपाल बालसाहित्य समाजबाट सन् २००७ मा उत्कृष्ट चित्रकारको पुरस्कार प्राप्त गर्नुभएको छ भने नेपाल परिवार नियोजन संघले आयोजना गरेको पोष्टर डिजाइन प्रतियोगिता सन् २००० साथै सेभ द वर्ल्ड पोस्टर डिजाइन प्रतियोगीता ११९३ जस्ता प्रतिस्पर्धामा सर्वोत्कृष्टको पुरस्कार हात पार्नुभएको छ । देवेनले २०६६ सालमा हेमगंगा युवा कला प्रतिष्ठानबाट युवा कला प्रतिभा पुरस्कार प्राप्त गर्नुभएको छ । उहाँले श्रीलंकाको कोलम्बोमा सन् १९९८ मा सम्पन्न दक्षिण एशियाली पोष्टर तथा कला प्रतियोगितामा समेत प्रथम स्थान हासिल गर्नुभएको छ ।
सम्पर्क - [email protected]
Read More
