350.00
अकथ्य
Description
०४६ सालको परिवर्तनपछि मुलुक चुनावमा जाने भयो । मतदाता नामावली सङ्कलन हुनुअगावै प्रधानले पगलीको नाममा नागरिकता जारी गराइसकेका थिए । मतदाता नामावलीमा पनि नाम समावेस गरियो - देवकीदेवी हमाल । कृष्णको आमा देवकी नै थिइन् । त्यही भएर होला रामचन्द्र बाजेले पनि पगलीको नाम देवकीदेवी राखिदिएका थिए । त्यस बेलासम्म मुर्चुङ्गीमा कुनै हमाल थरका घर थिएनन् । बुढाहरू जान्दथे हमाल क्षेत्री थर हो । आफ्ना घरमा काम गर्न राखिएको मान्छे निचो जातको पनि बनाउनुभएन । त्यसैले प्रधान बाजेले पनि गाउँमा नभएको तर पानी चल्ने थर भिराइदिएका थिए पगलीलाई । गाउँका कसैसँग नमिल्ने थर राखिदिएपछि पगलीलाई दोजिया बनाएको बात परोक्ष रूपमा पनि कसैलाई लाग्ने थिएन । एक एक भोटको महत्त्व थियो गाउँमा । आफू चुनावमा नउठे पनि प्रधानले चाहेको उम्मेदवारलाई जिताउन वा हराउन सक्थे । त्यही निर्णायक मतहरूमध्ये एक बन्न पुगेकी थिई देवकीदेवी । (जिजीविषाबाट)
प्रवीण खतिवडा
About the Author
प्रवीण खतिवडा नेपाली रगमञ्चका चर्चित एवम् व्यावसायिक कलाकार एवम् निर्देशक हुनुहुन्छ । २०४० साल पुस ८ गते मोरङको लेटाङमा जन्मिएका खतिवडाको अभिनयका साथै लेखनमा रुची छ । उहाँले 'अकथ्य' कथा सङ्ग्रहबाट लेखनमा पनि डेब्यू गर्नुभएको हो । आफ्नो पहिलो प्रकाशित पुस्तकमा उहाँले विभिन्न प्रयोगसँगै सीमान्तिकृत आवाजलाई समेट्नुभएको छ ।
अभि सुवेदीद्वारा लिखित एवम् रङ्गकर्मी सुनिल पोखरेलद्वारा निर्देशित आरोहण गुरुकुलको चर्चित नाटक 'अग्नीको कथा'बाट रङ्गमञ्चको अभिनय यात्रा अघि बढाएका खतिवडाले 'रशोमन', 'मार्क्स फर्किए', 'न्यायप्रेमी', 'घनचक्कर', 'पानी फोटो', 'बाघ भैरव', 'जात सोध्नु जोगी'को जस्ता दुई दर्जन बढी नाटकमा अभिनय गर्नुभएको छ । उहाँले 'विमोक्ष', 'मार्क्स फर्किए', 'मिमांश', 'सर्जिमिन', 'एक बोली एक दाम', 'ऊ कसको', 'हेड्डा ग्याब्लर', 'लखन पटवारी', 'महादेवको बाजी', 'ध्रुव' लगायतका दर्जन बढी नाटकको निर्देशनसमेत गर्नुभएको छ ।
'रशोमन'को नेपाली संस्करणमा उहाँले गरेको जब्बरे पात्रको अभिनय र नाटक 'विमोक्ष'मा देखाएको निर्देशकीय क्षमतालाई धेरैले सह्राएको पाइन्छ । रङ्गमञ्चमा अभिनय र निर्देशनका क्रममा प्रवीणले भारत, चीन, डेनमार्क, रुस, बङ्गलादेश, पाकिस्तान, बेलयत, स्वीडेन, जर्मनी आदी देशको भ्रमण गर्नुभएको छ । रङ्गमञ्चको अभिनयका लागि उहाँले सिजी अवर्ड समेत प्राप्त गर्नुभएको छ ।
पछिल्लो समयमा प्रवीण खतिवडा नेपाली चलचित्रमा समेत व्यस्त कलाकार हुनुहुन्छ । उहाँले 'लुट', 'लुट २', 'ढुवानी', 'बिना कारण', 'कालो पोथी', 'पण्डित बाजेको लौरी', 'जात्रा', 'गरुड पुराण', 'माछामाछा', 'अनागत', 'रङ्गेली', 'महाजात्रा', 'डोरी' लगायतका चलचित्रमा अभिनय गर्नुभएको छ । 'उमा', 'लालटिन', 'द स्पोन्सर', 'रेड सुटकेस', 'मिस्टर झोले', 'खाग', 'आधासुर' जस्ता चलचित्रमा निभाएको भूमिकाका कारण उहाँका प्रशंसकहरू बढेका छन् । उहाँका 'परान', 'कोशेढुङ्गा', 'शिवांश' लगायतका चलचित्रहरू प्रदर्शनको तयारीमा छन् ।
Read More
