माखाल

About the Author

तेजप्रकाश श्रेष्ठले नेपाली साहित्यका विभिन्न विधामा निरन्तर लेखिरहनुभएको छ । उहाँका 'माखाल', 'प्रेमको स्मारक' र 'संकल्प जिउँदो रहनेछ' नामका उपन्यास प्रकाशित भएका छन् ।

पिता रामबहादुर र माता तेजकुमारीका सुपुत्रका रूपमा २००३ सालमा बैतडीको खलङ्गाबजारमा जन्मिएका श्रेष्ठले पेसागत रूपमा निजामति सेवा अँगाले पनि साहित्य र संस्कृतिका क्षेत्रमा निरन्तर कलम चलाउनुभएको छ । उहाँ नेपाल सरकारको निजामति सेवामा ३१ वर्ष सेवा गरेपछि उपसचिवको तहबाट सेवा निवृत्त हुनुभएको हो । श्रेष्ठका ८ ओटा नियात्रा सङ्ग्रह, ६ ओटा कथा सङ्ग्रह, ७ ओटा लोकसाहित्य तथा संस्कृतिसम्बन्धी पुस्तकहरू प्रकाशित छन् । उहाँले दुई ओटा कविता सङ्ग्रह र दर्जनौँ बालसाहित्यका पुस्तकहरू लेख्नुभएको छ ।

उहाँका 'मेरो काखमा बहिनी', 'चाडपर्वलाई सलाम', 'सुनको रोटी सुनकै थाल', 'भोका डमरुहरू', 'पुतली', 'म राउत्या रौतेला', 'बुढो बटुवा', 'हाम्रो स्कुल', 'हिउँफूल', 'मिङ्मार' लगायतका बालपुस्तकहरू चर्चित छन् । नेपाली साहित्यमा स्‍नातकोत्तर पूरा गर्नुभएका श्रेष्ठले विभिन्न संघसंस्थामा नेतृत्वसमेत प्रदान गरिसक्नुभएको छ । नेपाल लोकवार्ता समाजका कोषाध्यक्ष रहनुभएका श्रेष्ठ नेपाल बालसाहित्य समाजको पूर्व अध्यक्ष, रमेश विकल साहित्य प्रतिष्ठानको संस्थापक कोषाध्यक्ष, नियात्रा समाजको संस्थापक सदस्य र लोकवार्ता परिषद् नेपालको आजीवन सदस्य हुनुहुन्छ । उहाँ आफ्ना पिता र माताको नाममा स्थापित रामबहादुर–तेजकुमारी श्रेष्ठ स्मृति कोषको अध्यक्षसमेत हुनुहुन्छ ।

उहाँले दर्जनौँ बालपुस्तकहरूको सम्पादन गर्नुभएको छ । उहाँ २०७१ देखि २०७९ सम्म बालसंसार प्रालिको सञ्चालक समितिको अध्यक्षसमेत हुनुहुन्थ्यो ।

श्रेष्ठले साझा बालसाहित्य पुरस्कार (२०६१), रमेश विकल बालसाहित्य पुरस्कार(२०७२), नूरगङ्गा बालसाहित्य प्रतिभा पुरस्कार (२०७३), कविताराम बालसाहित्य सम्मान (२०७२), देवकुमारी थापा वनिता बालसाहित्य पुरस्कार (२०७२) साथै सुरभि आख्यान पुरस्कार प्राप्त गर्नुभएको छ । उहाँ जनमत मासिक पत्रिकाको संरक्षक हुनुहुन्छ भने एक समय प्रकाशनमा रहेको साँ–ग्रिला मासिक पत्रिकाको सम्पादक पनि हुनुहुन्थ्यो ।