550.00
युगसन्धि
Description
युगसन्धि ऋषि वशिष्ठ र विश्वमित्रबीचको वैदिक कालको वैचारिक द्वन्द्वमा आधारित उपन्यास हो । उपन्यासमा आर्य र अनार्य जाती तथा संस्कृति, महिला तथा पुरुष एवम् रक्त शुद्धता र रक्त सम्मिलन पक्षधरहरूबीचको द्वन्द्व समेटिएको छ । यी प्रसङ्गहरूमा विश्वमित्र ऋषि र बशिष्ठ ऋषिबीचको द्वन्द्वमा कथा अगाडि बढेको छ । उपन्यासमा ब्रह्मशक्ति र राजशक्तिको समन्वय, महिला र पुरुषबीच समानता साथै आर्य र अनार्यबीचको समन्वयबाट मात्रै हिमाली क्षेत्रमा शान्ति कायम हुनसक्छ भनी वैदिक कालदेखि विमर्श हुँदै आएको तर्क अघि सारिएको छ ।
विजय चालिसे
About the Author
विजय चालिसे जीवनपर्यन्त नेपाली साहित्य र पत्रकारिता क्षेत्रमा निरन्तर कलम चलाउनुभएका स्रष्टा हुनुहुन्छ । २००८ साल असार २२ गते काठमाडौँ आरुबारीमा जन्मिएका चालिसेको २०८२ साल जेठ १६ गते निधन भएको हो ।
परिचय पब्लिकेसनले प्रकाशित गरेको 'युगसन्धि' उहाँको तेस्रो प्रकाशित उपन्यास हो । यसअघि, उहाँका 'होटेल राँकीमा हत्या' (२०३१) र 'अनि कुइरो फाट्छ' (२०३६) उपन्यास प्रकाशित भइसकेका छन् ।
पिता रमेश विकल र माता सुशीला चालिसेका सुपुत्र चालिसेले १२ वर्षको स्कुले जीवनदेखि नै साहित्यका विभिन्न विधामा कलम चालाउन थाल्नुभएको थियो । उहाँका 'त्रिविध', 'प्रयोग/प्रत्यारोपण', 'भग्न आस्थाको खण्डहर', 'अग्निचक्र', 'विज्ञानको कैदी', 'अभिशप्त रात' आदि गरी ७ ओटा कथासङ्ग्रह साथै 'डोटेली लोकसंस्कृति र साहित्य', 'अप्रिलको बेलायत', 'मरुभूमिको फूल' लगायतका संस्कृति र यात्रासम्बन्धि ८ ओटा निबन्ध कृतिहरू प्रकाशित छन् । चालिसे नेपाली बालसाहित्यलाई अत्यन्त माया गर्ने स्रष्टा हुनुहुन्छ । उहाँका 'लालुको यात्रा', 'लोखर्केको जिद्दी', 'पछुतो', 'अरिङ्गालको गोलो' सहित गरी ३ दर्जनभन्दा बढी बालसाहित्यका पुस्तक प्रकाशित छन् ।
विक्रम सम्वत् २०३७ मा नेपाली भाषामा स्नातकोत्तर पूरा गर्नुभएका चालिसेले २०४२ सालमा लण्डनबाट डिप्लोमा इन एड्भान्स जर्नलिजमको अध्ययन पूरा गर्नुभएको थियो । लामो समय अध्यापन र पत्रकारिता पेशामा संलग्न रहनुभएका चालिसेका आमसञ्चार र पत्रकारिता क्षेत्रमा 'समाचार लेखन तथा सम्पादन', 'आमसञ्चार, द्वन्द्व र आतङ्कवाद' सहितका आधा दर्जन पुस्तक प्रकाशित छन् । चालिसेले गोरखापत्र दैनिक, मधुपर्क, युवामञ्च र मुना मासिकको प्रधानसम्पादक हुँदै गोरखापत्र संस्थानको कार्यकारी अध्यक्षका रूपमा पनि जिम्मेवारी निर्वाह गर्नुभएको थियो । उहाँले दर्जनौँ पत्रपत्रिका र पुस्तकहरूको सम्पादन गर्नुभएको थियो । उहाँको रुची विदेशी साहित्यको अनुवादमा पनि थियो ।
चालिसेले हृदयचन्द्र सिंह पत्रकारिता पुरस्कार २०६८, पारिजात बालसाहित्य सम्मान २०७३, महाकवि देवकोटा राष्ट्रिय पुरस्कार २०७८ सहित दर्जनौँ पुरस्कार र सम्मान प्राप्त गर्नुभएको थियो ।
सामाजिक यथार्थ, अनुभव र अनुभूतिहरूलाई सरल र सहज ढंगले आफ्ना साहित्यमा पस्कने चालिसेले 'युगसन्धि' उपन्यासमा चाहिँ वैदिक समाज र संस्कृतिलाई उधिनेर वैदिक समाजका सङ्क्रमणकालीन परिवेशलाई उतार्ने प्रयास गर्नुभएको छ ।
Read More
