140.00
गन्दै गन्दै जान्छु
Description
लयबद्ध रूपमा अङ्क चिनारीको मर्मलाई पुस्तकले समेटेको छ । यसभित्र गन्ती कसरी गर्ने भनेर कविता छ । अङ्कलाई नै पात्र बनाएर चित्रहरू तयार गरिएको छ । सिकाइका लागि गीत उपयुक्त माध्यम हो । सिकाइको यसै शैलीलाई कक्षाकोठामा अपनाउन पुस्तकले सहयोग गर्दछ । अङ्क आफैँ बोलेको आकर्षक चित्रमा बालबालिका रमाउँछन् ।
डा. देवी नेपाल
About the Author
डा. देवी नेपाल प्राज्ञ कवि र समालोचकका रूपमा चर्चित हुनुहुन्छ । विक्रम सम्वत् २०३० वैशाख १८ गते झापा जिल्लाको हल्दीबारी, गोल्धापमा जन्मनुभएका नेपालले प्रगतिवादी नेपाली खण्डकाव्यमा द्वन्द्वविधान शिर्षकमा विद्यावारिधि (पिएचडी) गर्नुभएको छ । नेपाल संस्कृत विश्वविद्यालयमा प्राध्यापनमा आबद्ध नेपालले नेपाली भाषामा स्नातकोत्तर र साहित्यमा आचार्यसम्मको अध्ययन पूरा गर्नुभएको छ ।
हाल भक्तपुरको लोकन्थलीमा बस्दै आउनुभएका उहाँले नेपाल प्रज्ञा प्रतिष्ठानको प्राज्ञ परिषद् सदस्य तथा बालसाहित्य र लोकवार्ता विभागको विभागीय प्रमुखको रूपमा पनि कार्यकाल पूरा गर्नुभएको छ ।
उहाँका अआ पढ्ने बेला, को हो हँ कखगघङ, गन्दै गन्दै जान्छु, नाना देऊ पुतली, मामाघरको रोपाइँ, कुखुराको बिहेलगायतका दर्जनौँ बालसाहित्य कृतिहरू प्रकाशित छन् । छन्द कवितामा विशेष दक्खल राख्ने नेपालका छन्द पराग, छन्दको सुगन्ध साथै श्रद्धाञ्जली खण्डकाव्य लगायतका कृति पनि प्रकाशित छन् ।
पाठ्यक्रम विकास केन्द्रको नेपाली विषय समितिमा समेत विशेष जिम्मेवारीमा रहनुभएका डा. नेपालले एक दर्जन बढी पुस्तक तथा पत्रपत्रिकाको सम्पादन गर्नुभएको छ । २०० भन्दा बढी पुस्तकको भाषा सम्पादन गर्नुभएका उहाँ नेपाल प्रज्ञा प्रतिष्ठानबाट प्रकाशित बालप्रज्ञा पत्रिकाका संस्थापक प्रधान सम्पादक पनि हुनुहुन्छ ।
उहाँले युवा वर्ष मोती पुरस्कार, शारदा कोइराला बालसाहित्य वाणी पुरस्कार, रेडियो नेपाल राष्ट्रिय बालगीत प्रतियोगिता सर्वोत्कृष्ट रचना पुरस्कार जस्ता पुरस्कारसहित वैजयन्ती स्रष्टा सम्मान, भेरी साहित्य समाज सम्मानलगायतका सम्मान प्राप्त गर्नुभएको छ । उहाँ नेपाल बालसाहित्य समाजसहितका एक दर्जनभन्दा बढी राष्ट्रिय तथा अन्तराष्ट्रिय साहित्यिक सङ्घसंस्थामा आबद्ध हुनुहुन्छ ।
उहाँले बालसाहित्य लेखन तथा वाचन कला प्रशिक्षणसम्बन्धी ४०० भन्दा बढी कार्यशाला सञ्चालन गर्नुभएको छ ।
Read More
देवेन्द्र पाण्डे देवेन
About the Illustrators
देवेन्द्र पाण्डे ‘देवेन’ नेपालका चर्चित कार्टुनिष्ट एवम् इलस्ट्रेटर हुनुहुन्छ । विक्रम सम्वत् २०३१ कार्तिक ८ गते काठमाडौँमा जन्मनुभएका पाण्डे देवेन नामबाट कार्टुन र चित्रहरू बनाउनु हुन्छ ।
उहाँले 'मचानमा म', 'मामाघरको रोपाइँ', 'कुखुरी', 'सुरुङको बाटो', 'तोरीबारी', 'चिन मलाई', 'ऋतु', 'डहरको भूत', 'चमचम चङ्गा र लिलिपुट', 'चराको घुमघाम', 'डुङ्गामा सलल', 'अआ पढ्ने बेला', 'ऐया र आत्था', 'को हो हँ कखगघङ', 'गाउँदै गन्दै जान्छु', 'घ्यार्रघुर्र', 'चराका कथा', 'झ्याउँझ्याउँ झ्याउँकिरी', 'एकीकृत क्रियाकलापमा आधारित बालकेन्द्रित क्रियाकलापहरु' लगायतका सयौँ पुस्तकहरुमा चित्र बनाउनु भएको छ ।
सृजना कलेज अफ फाइन आर्ट्सको ग्राफिक कम्युनिकेसन विभागमा प्राध्यापनमा संलग्न देवेनले त्रिभुवन विश्वविद्यलय अन्तर्गत ललितकला क्याम्पसबाट फाइन आर्ट्समा प्रथम श्रेणी सहित स्नातक तह पुरा गर्नुभएको छ । हाल उहाँ नेपाल रिपब्लिक मिडिया प्रा लिका प्रकाशनहरू नागरिक दैनिक, रिपब्लिका दैनिक, शुक्रबार साप्ताहिक र परिवार मासिकमा नियमित रुपमा कार्टुन र इलस्ट्रेसन बनाउनुहुन्छ । उहाँले कान्तिपुर दैनिक, द काठमाण्डु पोष्ट र कामना प्रकाशन समुहका पत्रपत्रिकाहरूमा पनि कार्टुन र इलेस्ट्रेसनको काम गर्नुभएको थियो ।
कार्टुनिष्ट क्लब नेपालका पूर्व कोषाध्यक्ष देवेन आर्टिस्ट्स सोसाइटी नेपालको समेत सदस्य हुनुहुन्छ । उहाँले नेपालको कला क्षेत्रको इतिहासमा पहिलो पल्ट सन् २००३ मा नेपाल आर्ट काउन्सिलमा पप–अप्स कार्ड डिजाइनको एकल प्रदर्शनी गर्नुभएको थियो । उहाँले काठमाडौँ र फुकुआमा, जापानमा सम्पन्न विभिन्न चित्रकला प्रदर्शनीहरूमा सहभागी भई आफ्ना चित्रहरू प्रदर्शन गर्नुभएको छ ।
उहाँले चित्रकारका रुपमा नेपालका लागि संयुक्त राष्ट्रसंघिय मानव अधकार उच्च आयुक्तको कार्यालय, युनेस्को, रुम टु रिड भारत र नेपाल, प्राक्टिकल एक्सन, सेभ द चिल्ड्रेन आदि अन्तर्राष्ट्रिय संघसंस्था र निकायसँग पनि काम गर्नुभएको छ ।
उहाँले नेपाल बालसाहित्य समाजबाट सन् २००७ मा उत्कृष्ट चित्रकारको पुरस्कार प्राप्त गर्नुभएको छ भने नेपाल परिवार नियोजन संघले आयोजना गरेको पोष्टर डिजाइन प्रतियोगिता सन् २००० साथै सेभ द वर्ल्ड पोस्टर डिजाइन प्रतियोगीता ११९३ जस्ता प्रतिस्पर्धामा सर्वोत्कृष्टको पुरस्कार हात पार्नुभएको छ । देवेनले २०६६ सालमा हेमगंगा युवा कला प्रतिष्ठानबाट युवा कला प्रतिभा पुरस्कार प्राप्त गर्नुभएको छ । उहाँले श्रीलंकाको कोलम्बोमा सन् १९९८ मा सम्पन्न दक्षिण एशियाली पोष्टर तथा कला प्रतियोगितामा समेत प्रथम स्थान हासिल गर्नुभएको छ ।
सम्पर्क - [email protected]
Read More
