घैटो कि घन्टी

About the Author

शाश्वत पराजुली नेपालमा पठन संस्कृति विकासका लागि सक्रिय लेखक  हुनुहुन्छ । २०२६ मङ्सिर २७ गते काभ्रेमा जन्मनुभएका पराजुली पाठ्यक्रम विकास केन्द्रबाट प्रकाशित कक्षा १, २ र ३ का मेरो नेपाली पाठ्यपुस्तकका सहलेखक हुनुहुन्छ ।

उहाँका 'साथीलाई कोसेली', 'घैँटो कि घण्टी', 'नाइँ', 'मेरो कामना', 'बिचरो बुख्याँचा', 'सुरीको साइकल', 'वनभोज', 'आधा देशको राजकुमार', 'गुइँठे र गुलेली', 'मह बेच्ने भालु', 'बुँइगलको भूत', 'नबोल्ने हो', 'बुर्लुक्क उफ्रिँदै मुसुक्क हाँस्दै', 'गोपीको टोपी' जस्ता दर्जनौँ बालसाहित्यका पुस्तकहरू प्रकाशित भएका छन् ।

'मेला' बालपत्रिका साथै कान्तिपुर दैनिकको बाल परिशिष्टाङ्क 'कोपिला' जस्ता पत्रपत्रिकाको सम्पादनमा समेत संलग्न रहिसक्नुभएका पराजुलीले १०० भन्दा बढी बालसाहित्यका पुस्तकहरूको सम्पादन गरिसक्नुभएको छ । उहाँ सन् २०१५ देखि २०२१ सम्म प्रारम्भिक कक्षा पढाइ कार्यक्रमको पठनसामग्री प्रबन्धक साथै सन् २०१२ देखि २०१५ सम्म रुम टु रिड नेपालमा पढ्ने सामग्री कार्यक्रमको कार्यकारी प्रबन्धक जस्ता पदमा रहेर पठन संस्कृति विकासमा सक्रिय रहनुभयो । नेपाल बालसाहित्य समाजका पूर्वमहासचिव रहिसक्नुभएका पराजुली प्रकाशन संस्था मेला बुक्सका सञ्चालक पनि हुनुहुन्छ ।

त्रिभुवन विश्वविद्यालयबाट स्‍नातकोत्तरसम्मको अध्ययन पूरा गर्नुभएका पराजुलीले 'बिचरो बुख्याँचा' बालपुस्तकका लागि पारिजात उत्कृष्ट पाण्डुलिपि पुरस्कार प्राप्त गर्नुभएको छ भने 'आधा देशको राजकुमार' पुस्तकको लागि सारा बालसाहित्य पुरस्कार प्राप्त गर्नुभएको छ । उहाँले २०७२ को नेपाल बालसाहित्य समाज उत्कृष्ट बालपुस्तक लेखन पुरस्कार पनि प्राप्त गर्नुभएको छ ।